आज:  | Wed, 19, Jun, 2024

नेता झाको बिहार भ्रमण ः आरजेडी पार्टी कार्यालयमा भव्य स्वागत, शीर्ष नेतृत्वसँग भेट

युथ अफ वीरगंज September 14, 2022मा प्रकाशित (१ साल अघि) ५०८३ पाठक संख्या


वीरगञ्ज, २९ भदौ । बिहार भ्रमणका क्रममा रहनुभएका नेपाली कांग्रेसका नेता कञ्चन झाले राष्ट्रिय जनता दल (आरजेडी) का बिहार अध्यक्ष जगदानन्द सिंह र राष्ट्रिय महासचिव अब्दुल बारी सिद्धिकीसँग भेटवार्ता गर्नुभएको छ । भारत बिहारका कृषिमन्त्री सुधाकर सिंहको निमन्त्रणामा २ दिने बिहार भ्रमणको क्रममा रहनुभएका वहाँले बुधबार साँझ पार्टी कार्यालयमै आरजेडीका शीर्ष नेताहरुसँग भेटवार्ता गर्नुभएको हो ।
भेटका क्रममा नेपाल–भारत सम्बन्धबारे खुलेरै चर्चा भएको नेता झाको सचिवालयका प्रमुख जय साहले बताउनुभयो । आरजेडी अध्यक्ष सिंहले अबका दिनमा दुबै देशका युवाहरूमार्फत नेपाल–भारत सम्बन्धलाई नयाँ मुकाममा पु¥याउनुपर्ने आवश्यकता देखिएको बताउनुभएको थियो । दिवङ्गत समाजवादी नेता प्रदीप गिरीलाई स्मरण गर्दै वहाँले राजनीतिक–सामाजिक पथमा दृढ भएर अघि बढ्न पनि सुझाव दिनुभएको सचिवालय प्रमुख साहले जानकारी दिनुभयो ।
नेता झालाई पटनास्थित आरजेडी पार्टी कार्यालयमा भव्य स्वागत गरिएको थियो । सामाजिक सञ्जालको फेसबुकमा पोष्ट गर्दै वहाँले सम्मान, आतिथ्यता र सुझावका पार्टीका शीर्ष नेताहरु प्रति आभार प्रकट गर्नुभएको छ ।
नेता झा नेतृत्वमा रहेको टोलि २ दिने बिहार राज्य भ्रमणमा छ । यसअघि बुधबार बिहान वहाँले भारत बिहारका कृषिमन्त्री सुधाकर सिंहसँग भेटवार्ता गर्नुभएको थियो ।