आज:  | Tue, 25, Jun, 2024

किशोरी बलात्कार र हत्या प्रकरण: गाउँपालिकाले बन्द गर्‍यो मदरसा ।

युथ अफ वीरगंज November 7, 2023मा प्रकाशित (७ महिना अघि) २९६७४ पाठक संख्या


१५ वर्षीया किशोरीको बलात्कार र हत्या भएको घटनालाई लिएर गुल्मीको एक मदरसा बन्द भएको छ।
चन्द्रकोट गाउँपालिका वडा नम्बर ४ शान्तिपुरमा रहेको गुल्सने मदिना मदरसा बन्द भएको हो।
गत कात्तिक १७ गते बिहान चन्द्रकोट-४ हुग्दी खोलामा १५ वर्षीया किशोरी मृत फेला परेकी थिइन्। किशोरी नग्न अवस्थामा फेला परेकी थिइन्।
किशोरी मृत फेला परेपछि उनको हत्या आरोपमा प्रहरीले बाँके खजुरा गाउँपालिका वडा नम्बर ७ घर भई चन्द्रकोट बस्ने २३ वर्षीय रहिस खाँलाई पक्राउ गरेको थियो। उनी मदरसाका प्रशिक्षक हुन्।
यस घटना बाहिरिएपछि चन्द्रकोट गाउँपालिकाले उक्त मदरसाको अनुमती रद्द गरेको छ।
किशोरीको बलात्कार र हत्या आरोपमा प्रशिक्षक रहिस पक्राउ परेपछि मदरसा व्यवस्थापन समितिले नै विद्यालयको अनुमति रद्द गर्न सोमबार गाउँपालिकालाई पत्र लेखेको थियो। सोही पत्रका आधारमा मदरसा सञ्चालन अनुमति रद्द गरेको गाउँपालिकाका अध्यक्ष युवराज खत्रीले बताए।

चन्द्रकोटमा मुस्लिम समुदायको बसोबास रहेको र दैनिक सामूहिक नमाज पढ्न सहज होस् भनेर चार वर्षअघि मदरसा सञ्चालन ल्याइएको थियो।
मुस्लिम समुदायको धार्मिक विद्यालय मानिने उक्त गुल्सने मदिना मदरसामा पाका उमेरका मुस्लिम व्यक्तिहरू हरेक हप्ता शुक्रबार पुग्थे। विद्यालय जाने उमेरका बालबालिकाहरू दैनिक बिहानमा सामूहिक नमाज पढ्न जाने गरेका थिए।

मदरसामा दैनिक १५/१६ जना बालबालिकाले सामूहिक नमाज पढ्ने गरेको स्थानीय कमल खत्रीले बताए। तर सोही मदरसाका प्रशिक्षक २३ वर्षीय रहिस खाँ बालिका हत्या आरोपमा पक्राउ परेपछि मदरसा व्यवस्थापन समितिले नै विद्यालयको अनुमति रद्दको लागि गाउँपालिकालाई पत्र लेखेको हो।
किशोरीको हत्या अभियोगमा पक्राउ परेका खाँमाथि थप अनुसन्धानका लागि सोमबार जिल्ला अदालत गुल्मीबाट ५ दिनको म्याद थप गरिएको प्रहरीले जनाएको छ। प्रशिक्षक खाँ केही महिनाअघि मात्रै मदरसाको प्रशिक्षक भएर चन्द्रकोट गएका थिए।
मृतक किशोरी कक्षा ९ मा पढ्थिन्। बिहीबार परिवारसँग खेतमा धान काट्न किशोरी पनि पुगेकी थिइन्। खेतमा काम गर्ने व्यक्तिले उनलाई सुर्ती किन्न पठाएका थिए। त्यसपछि किशोरी फर्किएकी थिइनन्।
नफर्किएपछि शुक्रबार प्रहरीलाई जानकारी दिइएको थियो। त्यही बिहान किशोरी मृत अवस्थामा फेला परेकी थिइन्। किशोरीको घाँटी थिचेर हत्‍या भएको खुलेको प्रहरीले जनाएको छ।
श्रोत:- सेतोपाटी