आज:  | Sat, 22, Jun, 2024

सामुदायिक क्याम्पसलाई व्यापारीको बपौती बन्न दिन्न: डा. भगवान यादव

युथ अफ वीरगंज December 19, 2023मा प्रकाशित (६ महिना अघि) १५६२५ पाठक संख्या

वीरगंज । हरि खेतान बहुमुखी क्याम्पस वीरगंजका प्रमुख डा. भगवान यादवले क्याम्पस प्रमुखको जिम्मेवारीबाट आफू मुक्त नभएको बताएका छन् ।

क्याम्पसमै आइतवार पत्रकार सम्मेलनको आयोजना गरेर उनले आफूलाई अवकाश दिइएको कुरा अवैधानिक र अपमानपूर्ण रहेको भन्दै त्यसलाई आफूले नमान्ने वताएका हुन् ।

आइतबार मात्र बसेकाे क्याम्पस संचालक समितिकाे बैठकले क्याम्पस प्रमुख डा. भगवान प्रसाद यादवलाई अनिवार्य अवकाश दिने निर्णय गरेकाे थियाे ।

क्याम्पस सञ्चालक समितिका अध्यक्ष प्रेम प्रकाश (पी.पी) खेतानले डा. यादवलाई उमेर हदको कारण देखाउँदै अनिवार्य अवकाश दिएका सुचना जारी गरेका थिए । उनकाे ठाउ‍ँमा निमित क्याम्पस प्रमुखकाे जिम्मेवारी किशाेरी रायलाई दिइएकाे जानकारी समेत गराएका थिए ।

साे लगतै आइतबार नै क्याम्पस प्रमुखकाे जिम्मेवारी समेत रायले समाहलेका थिए । तर त्यसकाे भाेली पल्ट नै साेमबार क्याम्पस प्रमुखबाट हटाइएका डा. यादवले पत्रकार सम्मेलन गर्दै आफु नै क्याम्पस प्रमुख रहेकाे दाबी गरेका हुन् ।

करिब ४ दशकदेखि क्याम्पस प्रमुख रहेका डा. यादवले क्याम्पसलाई विधि विधान विपरीत सञ्चालन गरेको आरोप लाग्दै आएको छ ।

पत्रकार सम्मेलनमा डा. यादबले आफुलाई फर्जी तरिकाले हटाएको भन्दै सामुदायिक क्याम्पसलाई व्यापारीको बपौती बनाउन खाेजिएकाे आराेप समेत लगाए ।

उनले २०७८ साल मै बिघटन भएको समितिलाई आफुलाई हटाउने अधिकार नभएको भन्दै आफु अहिले पनि क्याम्पस प्रमुखको हैसियतले पत्रकार सम्मेलन गरेकाे वताए ।

यहाँको नागरिक समाजले चाहे सम्म आफु यहाँ रहने नचाहे आफु एक मिनट पनि नबस्ने भन्दै सामुदायीक क्याम्पसलाई व्यापारीहरुको बपौती वन्न कुनैपनि हालतमा नदिने उनले वताए ।