आज:  | Sat, 22, Jun, 2024

गौशालाले एकजना केटा साथीसँग गरेको च्याटबाट उमेर ‘एक्सपोज’

युथ अफ वीरगंज December 20, 2023मा प्रकाशित (६ महिना अघि) १५२६८ पाठक संख्या


गौशालाले एकजना केटा साथीसँग गरेको च्याटबाट उमेर ‘एक्सपोज’

काठमाडौं । क्रिकेटर सन्दीप लामिछानविरुद्धको मुद्दामा दुवैतर्फका वकिलहरुले आआफ्नो बहस नोट अदालतलाई बुझाएका छन् । यही बहस नोटका आधारमा वकिलहरुले अबको सुनुवाइमा संक्षिप्त बहस गरेपश्चात मुद्दाको फैसला हुनेछ ।

जिल्ला अदालतले गत कात्तिक २३ गते दुवैतर्फका वकिललाई बहस नोट बुझाउन आदेश गरेको थियो । न्यायाधीश केदारप्रसाद घिमिरेले एक महिनाभित्र (मंसिर २२ सम्म) बहस नोट बुझाउन आदेश दिएका थिए । धेरै कानून व्यवसायीहरुले नाम लेखाएको मुद्दामा बहसलाई बरालिन नदिन र चाँडो फैसला गर्न बहस नोट माग्ने प्रचलन छ ।

अदालको आदेशअनुसार जाहेरीकर्ता गौशला २६ को तर्फबाट सरकारी वकिलले छोटो बहस नोट बुझाएका छन् । सन्दीपका वकिलहरुले बुझाएको बहस नोट भने ४० पेज लामो रहेको स्रोतले बतायो ।

अदालत स्रोतका अनुसार दुवै पक्षको बहस नोटमा गौशला २६ को उमेरलाई सर्वाधिक महत्व दिइएको छ । सरकारी पक्षले सन्दीपसँग भेट हुँदा गौशाला २६ नाबालिग रहेको दाबी गरेको छ भने सन्दीप पक्षले १८ वर्ष कटिसकेको दाबी गरेको छ । बादी पक्षको तुलनामा सन्दीप पक्षका वकिलका कागजातहरु अकाट्य र विश्वसनीय देखिएको अदालत स्रोतले बताएको छ ।

सन्दीपका वकिलहरुले गौशाला २६ का ११ वटा दस्तावेज बहस नोटमा राखेका छन्, जसले उनी नाबालिग नरहेको प्रमाणित हुन्छ । गौशाला जन्मेको अस्पतालले दिएको प्रमाणपत्र र उनको पहिलो जन्मदर्ता सबैभन्दा बलिया प्रमाण हुन् । दुवै दस्तावेजमा गौशालाको जन्ममिति २०६१ साल उल्लेख छ । अस्पतालले दिएको बर्थ सर्टिफिकेटभन्दा एक महिना उमेर फरक पारेर गौशालाले पहिलो जन्मदर्ता निकालेकी छन् । अस्पतालको कागजमा उनको जन्ममिति २०६१/०२/१८ र पहिलो जन्मदर्तामा उनको जन्ममिति २०६१/०३/१८ उल्लेख छ । गौशालाको बसाइसराइ र विद्यालयका प्रारम्भिक डकुमेन्टमा २०६१/०३/१८ नै उल्लेख छ ।

गौशालाले पछि बनाएका कागजातहरुमा चाहिँ उमेर एक वर्ष घटाएकी छन् । उनले केही समयअघि मात्र निकालेको दोस्रो जन्मदर्तामा जन्ममिति २०६२/०३/१८ उल्लेख छ । यो जन्मदर्ता वादी पक्षका वकिलहरुले अदालतमा पेश गरेका छन् । यही जन्मदर्ताका आधारमा बनाइएको नागरिकता पनि उनीहरुले बहस नोटसँग समावेश गरेका छन् ।

तर, उनीहरुको पोल कहाँनेर खुलेको छ भने दोस्रो जन्मदर्तामा पनि पहिलो जन्मदर्ताकै रजिस्ट्रेसन नम्बर उल्लेख छ । यस्तोमा अदालतले सबैभन्दा पहिले बनाएको जन्मदर्तालाई आधिकारिक मान्छ । दोस्रो जन्मदर्तामा उमेर सच्याइएको र त्यसै आधारमा नागरिकता बनेकाले दुवै डकुमेन्ट ‘गलत’ ठहरिन सक्ने अदालत स्रोत बताउँछ । गौशालाले दोस्रो जन्मदर्ता र नागरिकता सन्दीपसँग भेट हुनुभन्दा केही अगाडि मात्र निकालेकी हुन् ।

जन्मदर्ताको विषयलाई सम्वन्धित वडा कार्यालयले पनि स्पष्ट बनाइसकेको छ । अदालतबाट माग भएअनुसार वडा सचिवले अदालतलाई चिठी लेख्दै आधिकारिक जन्ममिति २०६१/०३/१८ नै रहेको प्रमाणित गरिदिएका हुन् । यसले गौशालाको उमेर सन्दीपसँग भेट हुँदाको बखत १८ वर्ष नाघिसकेको ठहरिन्छ ।

सन्दीप पक्षले पेश गरेको अर्को बलियो प्रमाण भनेको एउटा च्याटको स्क्रिनसट पनि हो । उनले एक जना केटा साथीसँग च्याट गर्ने क्रममा आफ्नो वास्तविक उमेर आफैंले खोलेकी थिइन् । स्रोतका अनुसार उनीहरुबीच ज्योतिषलाई भविष्य हेराउने विषयमा कुराकानी भएको थियो । नेपालप्रेसलाई पनि प्राप्त उक्त स्क्रिनसटमा केटा साथीले गौशाला २६ सँग उनको जन्ममिति सोधेका छन् । गौशालाले २०६१/०२/१८ लेखेकी छन् । उनले लेखेको यो जन्ममिति वीरगञ्जको अस्पतालले दिएको बर्थ सर्टिफिकेटसँग मेल खान्छ । यो च्याटको स्क्रिनसट पनि सन्दीपका वकिलले बहस नोटसँगै समावेश गरेका छन् ।

सन्दीपको मुद्दामा अब ८ गतेलाई पेशी तोकिएको छ । अघिल्लोपटक तोकिएको पेशी वकिलहरु उपलब्ध नभएका कारण स्थगित भएको थियो । सर्वोच्च अदालतले फास्ट ट्र्याकबाट फैसला गर्न आदेश दिएको भए पनि यो मुद्दा विभिन्न कारण देखाउँदै लगातार धकेलिएको छ ।
-नेपाल प्रेस