आज:  | Tue, 25, Jun, 2024

६ महिनामा वीरगन्ज भन्सार नाकाबाट १४ अर्ब ८५ कराेडकाे नेपाली उत्पादन विदेश निर्यात

युथ अफ वीरगंज February 6, 2024मा प्रकाशित (४ महिना अघि) २९६२ पाठक संख्या

वीरगन्ज,२३माघ: वीरगन्ज नाकास्थित आईसिपी भन्सार नाका हुँदै चालु आर्थिक बर्ष २०८०/०८१ को पहिलाे ६ महिनामा भारत तथा तेस्रो मुलुक तर्फ १४ अर्ब ८५ करोड,६९ लाख १६ हजार मूल्य बराबरको नेपाली उत्पादन निकासी भएको छ ।

गत साउन देखि पुषसम्म ६ महिनाकाे अवधिमा वीरगन्ज आईसिपी भन्सार नाका हुँदै भारत, डेनमार्क, अस्ट्रेलिया, अमेरिका, चीन, रुस, फिलिपिन्स, थाइल्यान्ड लगायतका मुलुकहरूमा तेल, जुस, कपडा लगायतका नेपाली उत्पादन तथा जडीबुटी निकासी भएको वीरगन्ज आईसिपी भन्सार कार्यालयका प्रमुख भन्सार प्रशासक डिलाराम पन्थीले जानकारी दिए ।

आईसिपी भन्सार नाका हुँदै ३ अर्ब ५३ करोड ८५ लाख ५५ हजार मूल्य बराबरको फलफूलको जुस भारत निर्यात भएको छ भने ७ करोड ९२ लाख २२ हजार मूल्य बराबरको पाम आयल निर्यात भएको छ । त्यसैगरी ६२ करोड ६० लाख २४ हजार मूल्य बराबरको जमोठ कपडा निर्यात भएको छ ।

त्यसैगरी बत्तिसा, त्रिफला, च्वबनप्रास लगायतका डाबर नेपालका उत्पादनहरू १ अर्ब ६ करोड १० लाख ३८ हजार मूल्य बराबरको भारत निर्यात भएको छ भने ३ करोड ११ लाख ९ हजार मूल्य बराबरको भटमासको तेल निर्यात भएको छ ।

वीरगन्ज भन्सार नाकाबाट ८० करोड ६९ लाख ८८ हजार मूल्य बराबरको पिना, ४३ करोड १० लाख १४ हजार मूल्य बराबरको सेन्थेटिक यार्न, ३६ करोड ८० लाख २२ हजार मूल्य बराबरको आयुर्वेदिक तथा होमियापेथिक औषधीको कच्चा पदार्थ भारत तथा तेस्रो मुलुक निर्यात भएको पन्थीले जानकारी दिए ।

त्यसैगरी पछिल्लो ६ महिनाकाे अवधिमा उक्त नाकाबाट ३९ करोड १९ लाख ३३ हजार मूल्य बराबरको स्पोर्ट सुज, ३७ करोड, ५२ लाख बराबरको नेपाली कपडा, १२ करोड १६ लाख ८४ हजार मूल्य बराबरको उनी गलैँचा भारत निर्यात भएको वीरगन्ज भन्सार कार्यालयको तथ्याङ्कमा उल्लेख छ ।

वीरगन्ज नाकाबाट साउन देखि पुष मसान्तसम्म ३ अर्ब २६ करोड ६१ लाख ३६ हजार मूल्य बराबरको फलामे पाता, ४७ करोड ५० लाख २ हजार मूल्य बराबरको सि.आर.सिट, २९ करोड ४९ हजारको कुकुर तथा बिरालोको खाना, २३ करोड १५ लाख ६६ हजार मूल्य बराबरको लिडसिसा, ९ करोड ९४ लाख १० हजार मूल्य बराबरको सूर्यमुखी प्रशोधित तेल र ११ करोड ६९ लाख ६९हजार मूल्यको प्लास्टिकका बिर्को ढकनीहरू भारत निर्यात भएको आईसिपी भन्सार कार्यालय वीरगन्जका प्रवक्ता एवं प्रमुख भन्सार अधिकृत रामचन्द्र शर्मा ढकालले जानकारी दिए ।

चालु आर्थिक बर्ष २०८०/८१ काे ६ महिनाकै अवधिमा भारत तथा तेस्रो मुलुकबाट नेपालमा २ खर्ब ९३ अर्ब ७९ करोड ५९ लाख ८० हजार बराबरको सामान आयात भएको छ ।