मधेश प्रदेश

पर्सा जिल्लाको बालसंगठनको जग्गा कौडीको मोलमा लिज लिएका डा. दीपक शाक्यले बहाल समेत तिरिरहेका छैनन् । वीरगञ्ज पब्लिक कलेजका संस्थापक डा. शाक्य नेपाल बाल संगठन पर्साको सदस्य हुँदा आफ्नै छोरा संकल्प शाक्यको नाममा वीरगञ्जको मुटु मानिने आदर्शनगरको १२ कठा जग्गा २७ वर्षको लागि लिजमा कौडीको मोलमा लिएका थिए । त्यस जग्गामा रहेको बाल संगठनको भवन समेत सोही रकममा लिज दिएको देखिन्छ । तर उनले कबोल गरेको रकम पनि हालसम्म दाखिला गरेका छैनन् ।

डा. शाक्यले छोरा संकल्प शाक्यको नाममा लिजमा लिएको सो जग्गामा आदर्श विद्यालय चलाउँदै आएका छन् । २०६८ असार २१ गते भएको सम्झौता अनुरुप २ वर्षको लागि १ लाख ६१ हजार र त्यसपछि महिनाको २१ हजार १ सयको दरले बाल संगठनलाई दिने उल्लेख छ । सम्झौता पत्रमा प्रत्येक तीन वर्षपछि मासिक भाडामा १० प्रतिशत रकम वृद्धि हुने शर्त राखिए पनि डा. शाक्यले त्यस अनुरुपको रकम बाल मन्दिरलाई बुझाएका छैनन् ।

नेपाल बाल संगठनका केन्द्रीय सदस्य पराग सिंहका अनुसार हालसम्म डा. शाक्यले १३ वर्षको अवधिमा पटक पटक ताकेता गरेपछि जम्मा १६ लाख रुपैयाँ दाखिला गरेका छन् । जरिवाना बाहेक २१ लाख भन्दा बढी रकम असुल गर्नुपर्ने देखिएको उनले बताए । बहाल रकम जम्मा नहुँदा बाल संगठनको अडिटसमेत हुन नसकेको सिंहले बताए । आदर्शनगरको मुख्य चोकमा रहेको सो जग्गा कठ्ठाको मासिक कम्तीमा १ लाख रुपैयाँ बहाल आउने देखिन्छ ।

महिनाको १२ लाखकै दरले वर्षको १ करोड ४४ लाख रुपैयाँ बहाल आउने जग्गा शाक्यले २ लाख ५३ हजारमा उपभोग गरिरहेका छन् । २०६७ सालको चैत ९ गते बाल संगठनको तत्कालीन अध्यक्ष अशोक कुमार जयसवालको अध्यक्षतामा बसेको बैठकबाट डा. शाक्यले जग्गा २२ वर्षीय छोरा संकल्प शाक्यको नाममा लिज लिएका थिए ।

डा.शाक्य समेत सदस्य रहेको बाल संगठनको जग्गा लिजमा दिने निर्णयमा ४ जना अनुपस्थित रहेका थिए । स्थानीय वासिन्दाहरुका अनुसार शाक्यले कार्य समितिलाई प्रभावमा पारी बिना सार्वजनिक सूचना जग्गा आफ्नो छोराको नाममा लिजको निर्णय गराएको देखिन्छ । पछिल्लो समय शाक्य मधेश प्रदेश सरकारले स्थापना गरेको मधेश विश्वविद्यालयको उपकुलपति(भीसी) बनेका छन् ।

गत आम निर्वाचनको आचारसंहिता लागु भइसकेको अवस्थामा पुरानो मितिबाट शाक्यलाई तत्कालीन मुख्यमन्त्री मो.लालबाबु राउतले भीसी नियुक्त गरेका थिए । व्यापक आर्थिक चलखेल गरेर शाक्य भीसी नियुक्त भएको आरोप लागेको थियो । तलब सुबिधा मधेश विश्वबिद्यालयबाट बुझ्ने तर आफ्नो निजि वीरगञ्ज पब्लिक क्याम्पसको प्रवद्र्धन र बजारीकरण गर्दै आएका भीसी शाक्यले पछिल्लो पटक सिनेट बैठक गर्न पनि आर्थिक चलखेल गरेको आरोप लागेको छ ।

मधेश प्रदेश सरकारले चालु आर्थिक वर्षमा १० लाख रुपैयाँ मात्र बजेट विनियोजन गरे पनि भीसी शाक्य र उनका दुतले प्रदेश सरकारलाई प्रभावित गर्न सफल भएको बताइन्छ । मधेश कृषि विश्वविद्यालयको बजेट रोक्का गरेर पटक पटक छानबिन गराइरहेको प्रदेश सरकारले भने मधेश विश्वविद्यालयको सिनेट बैठक समेत गरेको छ ।

मधेश विश्वविद्यालय स्थापना, भीसी र रजिष्ट्रार नियुक्ति सम्बन्धी निर्णयहरुको कागजात समेत प्रदेश सरकारसित दुरुस्त नरहेकाले केही दिन पूर्व सो विश्वविद्यालयलाई गैरकानुनी रहेको धम्की दिएको बताइएको थियो । मधेश विश्वविद्यालयको स्थापना नै शाक्यलाई चुनावको मुखमा भीसी बनाउन गरिएको विपक्षीहरुले आरोप लगाएका थिए । तर जनमत पार्टीका मुख्यमन्त्री सतीशकुमार सिंहलाई प्रभावमा पारेर उनले सिनेटको बैठक गरी बजेट चलाइरहेका छन् ।

शाक्य अझै वीरगञ्ज पब्लिक क्याम्पसको संस्थापक निर्देशक हुन् । विश्वविद्यालयका कयौँ कर्मचारी, प्राध्यापक र पदाधिकारी शाक्यको कलेजमा कार्यरत्त रहेका छन् । मधेश विश्वविद्यालयले हालसम्म कर्मचारी भर्ना वा प्राध्यापक भर्नाका लागि सार्वजनिक रुपमा आवश्यकताको सूचना समेत प्रकाशन गरेको छैन ।

रकमको चलखेल गरी जग्गा र पद हत्याउन खप्पिस शाक्यले प्रदेश सरकारलाई प्रभावका लिएर विश्वविद्यालयमा समेत अनियमितता गर्न थालेको बताइन्छ । यस सम्बन्धमा डा. शाक्यसित सम्पर्क गर्दा उनले नियम अनुसार नै जग्गा लिजमा लिएको र त्यसबाट कुनै प्रकारको व्यवसायिक लाभ नलिएको दाबी गरे । मधेश विश्वविद्यालय समेत व्यवस्थित रुपमा अगाडि बढेको उनले बताए ।

श्रोत:- मध्य नेपाल / राजन रौनियार

वीरगंज, ५ पुष । वीरगंज महानगरपालिकालाई संस्थागत विद्यालयको स्तर तथा शुल्क निर्धारण कार्यान्वयनको बाटो खुलेको छ ।

महानगरले गरेको स्तर तथा शुल्क निर्धारणको निर्णय विरुद्ध राष्ट्रिय आवासीय तथा निजी विद्यालय एशोसिएसन नेपाल (एनप्याब्सन) पर्साले दायर गरेको रिट उच्च अदालत जनकपुरको अस्थायी ईजलास वीरगञ्जले शुक्रबार खारेज गरेसँगै महानगरलाई आफ्नो निर्णय कार्यान्वयन गर्ने बाटो खुलेको हो ।
महानगरले २०७९ मंसिर २१ गते सूचना जारी गर्दै सोही शैक्षिक सत्रबाटै स्तर तथा शुल्क निर्धारण भए बमोजिममात्रै गर्न सबै संस्थागत विद्यालयलाई निर्देशन जारी गरेको थियो ।
महानगरले गरेको स्तर तथा शुल्क निर्धारणको विरुद्ध एनप्याब्सनले मंसिर २३ गते दायर गरेको रिट माथि सोही वर्षको पुष ७ गते सुनुवाई गर्दै महानगरको नाममा उत्प्रेषणको अन्तरिम आदेश जारी गरेको थियो ।
अन्तरिम आदेशसँगै महानगरले गरेको स्तर तथा शुल्क निर्धारण कार्यान्वनमा ल्याउन रोकिएको थियो ।
उच्च अदालत जनकपुरको अस्थायी ईजलास वीरगञ्जका न्यायाधीश राजन भट्टराई र भरत लम्सालको संयुक्त इजलासले शुक्रबार संस्थागत विद्यालयको स्तर तथा शुल्क निर्धारण विरुद्ध एनप्याब्सनले दायर गरेको रिट खारेज गरिदिएको हो ।
शुक्रबार महानगरको तर्फबाट अधिवक्ता कमलमोहन पोखरेल र प्रमोद साहले बहस गर्नुभएको थियो ।

संस्थागत विद्यालयमा हुने गरेको शुल्क विवादलाई सँधैका लागि निराकरण गर्न स्तर वर्गिकरण गरेर महानगरले शुल्क नै निर्धारण गरेको थियो ।
महानगरपालिकाले शैक्षिक क्षेत्र सुधारका लागि नेपालमै पहिलो पटक संस्थागत विद्यालयकोे स्तर वर्गिकरण गरेर शुल्क निर्धारण गर्ने प्रयास गरेको थियो ।
विद्यालय वर्गिकरणका लागि महानगरले १३० भन्दा बढी सूचक तय गरी ती सूचकलाई नम्बरिङ गरेर स्तर मापन गरेको थियो ।
वर्गिकरणमा सहभागि हुन महानगरले स्वमुल्याकंन आवेदन आह्वान गरेको थियो । महानगरमा सञ्चालित १ सय २ विद्यालयमध्ये ५८ वटाले मात्र स्वमुल्याङ्कन फारम भरेका थिए ।
फारम भरेका ५८ वटा संस्थागत विद्यालयलाई सूचकका साथै उनीहरुको भौतिक अवस्था, पठन पाठनको गुणस्तरीयता र विद्यार्थी संख्याको समग्र आधार बनाएर क, ख, ग र घ वर्ग छुट्याएर वर्गिकरण गरिएको थियो ।
वर्गिकरणमा नआएका अन्य संस्थागत विद्यालयलाई स्वत ‘घ’ वर्गमा राखिएको थियो । जस अनुसार वीरगञ्जमा नाम चलेको ग्यान्दा एकेडेमी, गौतम, नेशनल इन्फोटेक, डिएभी आरभी केडिया, लिटिल फ्लावर र जिएचपी गरी ६ वटा विद्यालय ‘क’ वर्गमा परेका थिए । २४ वटा ‘ख’ वर्गमा, २७ वटा ‘ग’ वर्गमा र एउटा विद्यालय ‘घ’ वर्गमा परेका थिए । वर्गीकरणको प्रक्रियामा नआएका सबै विद्यालय ‘घ’ वर्गमा पर्ने भनिएको थियो ।
महानगरले स्तर तथा शुल्क निर्धारणका लागि मेयर राजेशमान सिंहको संयोजकत्वमा ७ सदस्यीय विद्यालय स्तरीकरण तथा शुल्क निर्धारण समिति गठन समेत गरेको थियो ।

बिरगंज ०१ पुस आज “पिक्स लेन्स ” ले आफ्नो ५ औं वार्षिकोत्सव धुमधामका साथ सम्पन्न गरेको छ। बिरगंजको आदर्शनगर स्थित आमाको माया छात्रावासमा आफ्नो ५ औं वार्षिकोत्सव सम्पन्न गरेको हो।सो कार्यक्रमको प्रमुख अतिथी बिरगंज उधोगबाणिज्य संघका पुर्व अध्यक्ष एवम् वरिष्ठ उधोगपति गणेश लाठ एवं पिक्स लेन्स का ब्यस्थापक सौरभ अग्रवालको अध्यक्षतामा सम्पन्न भएको थियो भने
कार्यक्रम संचालन स्तुति बरनवाल गरेकि थिईन। कार्यक्रममा
निरज,मनिष लाठ, देवानन्द,अन्मोल,दिपक मानवसेवा आश्रम बिरगंजका संस्थापक अध्यक्ष दिवेश मानवसेवा,ओम कुमार झा,सन्चारकर्मी अभिलाष गुप्ता,कन्हैया पटेल, सुर्यनारायण बिक लगाएतकाहरुको पनि उपस्थिति रहेको थियो।

सो कार्यक्रममा आश्रमका बालबालिकाहरुको लागि कोपि,पेन,पेन्सिल,चप्पल एवं फुटबल आमाको माया छात्रावासको कोषाध्यक्ष गणेश खेतान लाई दिई बितरण गरिएको थियो भने सो आश्रमका बच्चाहरु द्वारा केक काटिएर उत्सव मनाईएको थियो र साथै आश्रमका सम्पुर्ण बच्चाहरुको लागि नास्ताको समेत ब्यवस्था गरिएको थियो।

अग्रवालका अनुसार बिगत ५ वर्ष देखि विभिन्न एन.जि.ओ. एवं आई.एन.जि.ओ. मा निशुल्क रुपमा सेवा दिदै आईरहेको छ अनि आउने दिनमा पनि सेवा दिने यहि कार्यक्रम मार्फत घोषणा समेत गरेका थिए।

बिरगंजमा बिगत ५ वर्ष देखि आफ्नो छुट्टै पहिचान बनाउन सफल यस Pics Lens ले आधुनिक तरिका बाट फोटोग्राफि र भिडियोग्राफि गर्ने काम गर्दै आएको छ। बिरगंजवासीको मनमा लोक प्रिय बन्न सफल भएको छ। पिक्स लेन्स नाम सुन्ने बितिकै आज उसले हरेक जनाको मनमा एक छुट्टै स्थान हासिल गरिसकेको छ।

उनका भनाई अनुसार
फोटोग्राफी भन्ने शब्द ग्रीक भाषाबाट आएको हो । ग्रीक भाषामा फोटोको अर्थ लाइट र ग्राफीको अर्थ स्केच हुन्छ अर्थात् प्रकाशको माध्यमद्वारा तयार गरिने चित्र नै फोटोग्राफी हो । आज हरेक मानिसले कुनै न कुनै रुपमा एवं समयमा आफूलाई फोटोग्राफरको रुपमा प्रस्तुत गर्ने गरेको पाइन्छ । स्वतन्त्र तथा सौखिन फोटोग्राफरहरुको संख्या पनि बढ्दो छ । क्यामेराका कुनै पनि माध्यमबाट तस्बिर कैद गर्दैमा त्यस व्यक्तिलाई फोटोग्राफर मान्न भने सकिँदैन । फोटोग्राफर बन्न केही आधारभूत ज्ञान, सीप र शैली हुन जरुरी छ । फोटोग्राफर हुन क्यामेराको प्राविधिक ज्ञान तथा दृश्यको भाव एवं मर्म बुझेको हुनैपर्छ । आजको समयमा फोटोग्राफीमा ज्ञान हासिल गर्न आवश्यक शैक्षिक संस्थाहरु समेत संचालनमा छन। युट्युब जस्ता प्लेट फर्म मार्फत बाट पनि फोटोग्राफीको ज्ञान लिन सकिन्छ।सो कार्यक्रममा पिक्स लेन्स का पदाधिकारी एवं कर्मचारी तथा ग्राहकवर्ग,संचारकर्मीहरुको उपस्थिति रहेको थियोे।

बिरगंज स्थित वडा नं १० मा रहेको घडीअर्वा पोखरीमा छठघाटको सम्पूर्ण तयारी पूरा भएको छठपूजा व्यवस्थापन समितिले आज पत्रकार सम्मेलन गरी जानकारी गराएको छ । पत्रकार सम्मेलनमा छठपूजा व्यवस्थापन समितिका सचिव लखनलाल साह कानूले छठघाटको व्यवस्थापन र सजावटको काम पूरा भएको बताए । उनले यसपालि छठघाटको सजावट र व्यवस्थापनमा करीब १८ लाख ४४ हजार ५ सय रुपियाँ खर्च हुने अनुमान गरिएको बताए ।

त्यस्तै उनले  पल्ट टेन्ट–पण्डालमा ७ लाख ८१ हजार, परिसर बाहिरको बत्ती सजावटमा ९० हजार, भिडियो ग्राफीमा ३५ हजार, पुरस्कारमा ४ लाख ८४ हजार , सरसफाइमा ७५ हजार , स्टेसनरीमा ५३ हजार , अतिथि खर्चमा ८५ हजार प्रचार प्रसारमा ३६ हजार लगायत खर्चको अनुमान गरिएको बताए।

त्यस्तै सुरक्षा उपसमितिका संयोजक मनोहर साह कानु ले छठघाटमा व्रतालु, दर्शनार्थी र भक्तजनको सुरक्षा र सहजताका लागि नेपाल प्रहरी, सशस्त्र प्रहरी र सादा पोशाकमा गरी १०० सुरक्षाकर्मी र घडीअर्वा स्पोर्ट्स क्लबका ४० जना स्वंयसेवक परिचालन गरिने जानकारी गराए । 

यस्तै छठघाट परिसरमा २० वटा भन्दा बडि सिसिटिभी क्यामेरा जडान गरिएको र कार्यक्रम अवधिभर सुरक्षा लाई मध्यनजर गर्दै वारुणयन्त्र र एम्बुलेन्स सेवा परिचालन गरिने समिती ले जनाएको छ ।

घडिअर्वा पोखरी  छठ  पुजा ब्यवस्थापन समितिका अध्यक्ष दिप कुमार कानुको अध्यक्षतामा भएको पत्रकार सम्मेलनमा पूर्व अध्यक्ष प्रेम साह कानु र , वीरगन्ज १० का वडाअध्यक्ष सुशील साह कानु , समितिका उपाध्यक्ष राकेस साह कानु , घडीअर्वा स्पोर्ट क्लबका अध्यक्ष सन्तोष कानु लगायतको  सहभागीता रहेको थियो ।

कार्यक्रमको सहजीकरण घडिअर्वा छठ पुजा ब्यवस्थापन समिति प्रचार प्रसार उपसमिति का संयोजक क्रान्ति साह ले गरेका थिए ।