वीरगञ्ज । मधेश प्रदेशका प्रदेश सभा सदस्य रहबर अन्सारीले जनता समाजवादी पार्टीका सांसद वीरेन्द्रप्रसाद महतोलाई कारबाही गर्न माग गरेका छन् । छोराको समकक्षता पत्र लिँदा शिक्षा मन्त्रालयअन्तर्गतको सानोठिमीस्थित कार्यालयलाई बिचौलियामार्फत पाँच हजार रुपैयाँ घुस दिएको बताएका सांसद महतोलाई कारबाही गर्न माग गर्दै अन्सारीले प्रतिनिधि सभाको राज्यव्यवस्था तथा सुशासन समितिमा उजुरी दिएका छन् ।
नेकपा (माओवादी केन्द्र) बाट पर्सा क्षेत्र नम्बर १ (क) बाट निर्वाचित प्रदेश सभा सदस्य अन्सारीले महतोलाई कानुनबमोजिम कारबाही गर्नुपर्ने माग गर्दै बुधबार समितिमा निवदेन दिएका हुन् ।
‘भ्रष्टाचार निवारण ऐन २०७९ को दफा ३ को उपदफा ३ मा घुस लिने-दिनेलाई सजायको व्यवस्था छ । रिसवत् दिने कामलाई रोक्नुको सट्टा त्यसलाई प्रोत्साहन गरेको हुँदा महतोलाई कानुन बमोजिम कारवाही गरियोस्’ अन्सारीले निवेदनमा लेखेका छन् । ऐन कानुनलाई कार्यन्वयन गर्ने निकायमै रहेका जिम्मेवार व्यक्तिबाट उल्टै कानुन विपरितका काम भएपछि क्षम्य नहुने मधेश प्रदेशका पूर्व राज्य मन्त्री समेत रहेका अन्सारीको बुझाई छ ।
महतोको अभिव्यक्तिपछि छानबिन गर्न शिक्षा मन्त्रालयले पनि समिति बनाएको छ । गृहमन्त्री रमेश लेखकले पनि यस घटनाबारे पूर्वमन्त्री महतोसँग जानकारी लिइएको र थप अनुसन्धान गर्न प्रहरीलाई भनिएको बताएका थिए ।
