मुस्कान श्रेष्ठ । वीरगञ्ज,पर्सा–१८ भाद्र । राष्ट्रिय वाणिज्य बैंक पूर्व कर्मचारी संघ ईकाई समिति वीरगञ्जले आज एक कार्यक्रमको आयोजना गरेर २६ औँ वार्षिकोत्सव मनाएको छ ।
वणिज्य बैंकको प्रादेशिक कार्यलय वीरगञ्जको सभा कक्षमा आयोजित कार्यक्रममा शुभकामना आदानप्रदान गर्नुका साथै ८० वर्ष नाघेका दुई पूर्व कर्मचारीलाई सम्मान समेत गरिएको छ ।
राष्ट्रिय वाणिज्य बैंक मधेश प्रदेश कार्यालयका प्रमुख कमलेश ठाकुर र वीरगञ्ज शाखाका प्रमुख नरसिंह नारायण यादवे संयुक्त रुपमा वाणिज्य बैंक वीरगञ्जका वरिष्ठ पूर्व कर्मचारीद्वय रतन कुमार श्रेष्ठ र नारायणी देवी श्रेष्ठलाई दोसल्ला र कदर पत्रसहित सम्मान गर्नुभएको थियो ।
लामो समयदेखि काम गरेको संस्थाबाट यो उमेरमा आएर यसरी सम्मानित हुँदा खुसी लागेको पूर्व कर्मचारी नारायणी देवी श्रेष्ठले बताउनुभयो । उहाँले संघको हकहितका लागि आफ्नो तर्फबाट हरसमभव प्रयास गर्ने बताउनुभयो ।
कार्यक्रममा वक्ताहरुले आर्थिक अवस्था कमजोर भएका सदस्यहरुलाई सहयोग गर्न तथा सघलाई आर्थिक रुपमा सशक्त बनाउन कोष स्थापना गर्नुपर्ने कुरामा जोड दिएका थिए । यस्तै आफूले गरेको कार्य अवधिमा सिकेको सिपलाई आगामी दिनमा कसरी प्रयोग गर्ने विषयमा छलफल गर्नुपर्ने बताएका थिए ।
राष्ट्रिय वाणिज्य बैंक पूर्व कर्मचारी संघका अध्यक्ष महेन्द्र दासको सभापतित्वमा सम्पन्न कार्यक्रममा संघका सचिव जयसुदन श्रेष्ठ, वाणिज्य बैंकका पूर्व क्षेत्रीय प्रबन्धक राजेन्द्र जैसवाल , पूर्व कर्मचारी मृनाल अधिकारी, राजु श्रेष्ठ लगायतको सहभागिता रहेको थियो ।
