वीरगंज, बहुवारी–१४ ।
वीरगञ्ज । वीरगञ्जस्थित स्पर्श मल्टीस्पेस्यालिटी हस्पिटलले पर्साको बहुदरमाई नगरपालिका–२ बैरिया बिर्तामा निःशुल्क स्वास्थ्य शिविरको आयोजना गरेको छ ।
स्थानीय समुदायको स्वास्थ्य सेवामा पहुँच वृद्धि गर्ने उद्देश्यले आयोजित शिविरमा तिन सय भन्दा बढी व्यक्तिहरूले लाभ लिएको अस्पताल प्रशासनले जनाएको छ ।
शिविरमा अस्पतालका वरिष्ठ चिकित्सक तथा जनरल फिजिसियन डा. महेश्वर प्रसाद कुर्मी, मुटु रोग विशेषज्ञ डा. मधु गुप्ता, हाडजोर्नी तथा नशा रोग विशेषज्ञ डा. दीपेश साह, मिर्गौला तथा मूत्र रोग विशेषज्ञ डा. अशोक राज र डा. चिरन गिरीलगायत अन्य स्वास्थ्यकर्मीहरूको टोलीले सेवाग्राहीहरूलाई स्वास्थ्य जाँच तथा परामर्श प्रदान गरे। चिकित्सकहरूले निःशुल्क स्वास्थ्य जाँचका साथै आवश्यक औषधि वितरण गरेका थिए ।
उनीहरूले रक्तचाप, मधुमेह, हड्डी तथा मुटु सम्बन्धी रोगहरूको परीक्षण, परामर्श तथा आवश्यक औषधिको सिफारिस निःशुल्क रूपमा गरेका थिए।
सामाजिक उत्तरदायित्वको उदाहरण
अस्पताल व्यवस्थापनले स्थानीय समुदायप्रति आफ्नो सामाजिक उत्तरदायित्व बहन गर्दै यस्तो सेवा सञ्चालन गरेको जनाएको छ। अस्पतालका निर्देशकका अनुसार, “हाम्रो उद्देश्य केवल उपचारमा सीमित छैन, हामी समुदायमा स्वास्थ्यप्रति सचेतना र पहुँच दुवै विस्तार गर्न चाहन्छौं।”
स्थानीय बासिन्दाको उत्साहजनक सहभागिता
शिविरमा स्थानीय नागरिकहरूको उत्साहजनक उपस्थिति रहेको थियो। उनीहरूले यस्तो सेवाले आम नागरिकलाई राहत मिल्ने र समयमै रोग पत्ता लगाउन मद्दत पुग्ने बताएका छन्।
निरन्तरता दिने तयारी
स्पर्श मल्टीस्पेशलिटी हॉस्पिटलले यस्ता शिविरलाई भविष्यमा पनि निरन्तरता दिने बताएको छ। विशेष गरी ग्रामीण तथा पिछडिएका क्षेत्रलाई लक्षित गर्दै आगामी महिनाहरूमा थप शिविरहरूको योजना बनाइएको छ।
