पर्सा, २०८२ जेठ ११ – सशस्त्र प्रहरी बल, नेपालले भारत–नेपाल सीमावर्ती क्षेत्र वीरगञ्जबाट ठूलो परिमाणमा अवैध सामान नियन्त्रणमा लिएको छ। सशस्त्र प्रहरी बल नं. १३ गण हेडक्वार्टर, पर्सा अन्तर्गतका विभिन्न सीमा सुरक्षा गुल्म र बोर्डर आउट पोष्ट (BOP) बाट खटिएको टोलीले संयुक्त रूपमा गरेको कारबाहीमा झण्डै रु. १० लाख ८४ हजार १ सय ९० बराबरको अवैध सामान नियन्त्रणमा लिइएको हो।
सशस्त्र प्रहरीका अनुसार, वीरगञ्ज महानगरपालिका अन्तर्गतका विभिन्न स्थानबाट भारतबाट नेपाल र नेपालबाट भारततर्फ अवैध रुपमा भन्सार छली चोरी पैठारी तथा निकासी गरिँदै गरेका सामग्रीहरू बरामद गरिएको हो। सशस्त्र प्रहरी बल, प्रस्तावित सीमा सुरक्षा गुल्म बीरगञ्जबाट खटिएको टोलीले रु. ८ लाख ३७ हजार १ सय २० बराबरका दुई थान मोटरसाइकल, किराना सामान, तयारी कपडा, मोबाइल पार्ट्स, मोटर पार्ट्स, फलफूल, मदिरा लगायतका सामान नियन्त्रणमा लिएको छ। यी सबै सामानहरू वीरगञ्ज भन्सार कार्यालयमा बुझाइएको जनाइएको छ।
यस्तै, सोही दिन सशस्त्र प्रहरी बल, प्रस्तावित सीमा सुरक्षा गुल्म अलौबाट खटिएको टोलीले पर्सा जिल्लाको अलौ तथा कोनिया इलाकाबाट रु. १ लाख १८ हजार २ सय बराबरको भन्सार छली गरिएका वस्तुहरू नियन्त्रणमा लिएको छ। त्यसैगरी, बिओपी प्रसौनीभाठा र बिओपी सिर्सिया टोलीहरूले संयुक्त रूपमा रु. १ लाख २८ हजार ८ सय ७० बराबरको अवैध सामान नियन्त्रणमा लिई वीरगञ्ज भन्सार कार्यालयमा बुझाएका छन्।
सशस्त्र प्रहरी नायव उपरिक्षक तथा सूचना अधिकारी देवेन्द्र बहादुर सिंहले सीमावर्ती क्षेत्रमा गैरकानुनी कारोबार नियन्त्रण गर्न सशस्त्र प्रहरीले नियमित गस्ती तथा निगरानी बढाएको जानकारी दिएका छन्।
उक्त कारबाहीले सीमामा भइरहेको अवैध कारोवारमा ठोस नियन्त्रण हुने विश्वास लिइएको छ।
