वीरगञ्ज, पर्सा — वीरगञ्ज उद्योग वाणिज्य संघले एक प्रेस विज्ञप्ति जारी गर्दै मुस्लिम संघ, पर्साका अध्यक्ष जफर अंसारीद्वारा एभिन्यूज टेलिभिजनमा दिएको अभिव्यक्तिप्रति गम्भीर आपत्ति जनाएको छ। उक्त अभिव्यक्तिलाई संघले गैरजिम्मेवारपूर्ण, निराधार र सामाजिक सद्भाव विथोल्ने किसिमको भन्दै आलोचना गरेको छ।
संघका अध्यक्ष हरिप्रसाद गौतमद्वारा जारी विज्ञप्तिमा भनिएको छ, “हनुमान जयन्तीको शोभा यात्राको क्रममा दुई पक्षबीच भएको झडप र त्यसपछि उत्पन्न परिस्थितिलाई लिएर मुस्लिम संघका अध्यक्षजस्तो जिम्मेवार पदमा बसेको व्यक्तिबाट समाजमा मेलमिलाप कायम गर्ने सन्देश दिनुको सट्टा पूर्व अध्यक्ष अशोककुमार वैधको समेत नाम जोड्दै आधारहीन अभिव्यक्ति दिइनु अत्यन्त निन्दनीय छ।”
विज्ञप्तिमा विशेषतः मित्र राष्ट्र भारतको एक प्रतिष्ठित संस्थाको नामसमेत सार्वजनिक रूपमा जोडेर दिएको बयानले नेपाल–भारतबीचको दीर्घकालीन सम्बन्धमा नकारात्मक प्रभाव पार्न सक्ने भन्दै संघले गम्भीर आपत्ति जनाएको छ।
संघले यस्ता खालका असंवेदनशील र उत्तेजक अभिव्यक्तिको तत्काल खण्डन गरी सार्वजनिक रूपमा माफी माग्न अंसारीलाई आग्रह गरेको छ। यदि माफी नआएमा संघ कानुनी प्रक्रियामा जाने चेतावनी दिएको छ।
संघको ठहरमा, समाजमा तनाव फैलाउने र राष्ट्रबीचको सम्बन्धमा खलल ल्याउने अभिव्यक्ति दिने व्यक्तिमाथि कडा कानुनी कारबाही हुनु आवश्यक छ।
