पर्सा, साउन २० — अपहरण, शरीरबन्धक तथा जबरजस्ती करणी अभियोगमा संलग्न दुई जना व्यक्तिहरूलाई प्रहरीले पर्साको वीरगञ्जबाट पक्राउ गरेको छ।
२०८२ साल वैशाख २० गते दिउँसो करिब ३ बजे, पर्सा जिल्लाको बरैनिया क्षेत्रका एक किशोरी (नाम गोप्य)लाई आफ्नै बाख्राको गोठबाट बाख्रा बाँधेर फर्कने क्रममा दुई जना अज्ञात व्यक्तिहरूले बाटोमै घेरा हालेर जबरजस्ती कपडा थुतेर आँखामा कालोपट्टी बाँधी वीरगञ्ज बसपार्कस्थित गणेश होटल एण्ड लजको दोस्रो तल्लामा लगेर कोठामा थुनी पालैपालो बलात्कार गरेका थिए। त्यसपछि पीडितलाई २०८२ साल वैशाख २३ गते बिहान ८ बजे वीरगञ्जको घडिअर्वा पोखरीस्थित गल्लीमा रगताम्मे अवस्थामा एक्लै छोडेर अभियुक्तहरू फरार भएका थिए।
पीडितले दिएको किटानी जाहेरीका आधारमा घटनामा संलग्न दुई जना अभियुक्तहरूलाई प्रहरीको विशेष टोलीले २०८२ साउन २० गते दिउँसो १:१० बजे वीरगञ्ज महानगरपालिका–१५ स्थित प्रतिमा चोकबाट पक्राउ गरेको हो।
पक्राउ परेका अभियुक्तहरू यस प्रकार छन्:
१. नेक महमद — पर्सा जिल्लाको बहुदरमाई नगरपालिका–२, सिसियारीका स्थायी बासिन्दा, हाल वीरगञ्ज–१३, राधेमाईमा बसोबास। उनी नेक मोटरसाइकल वर्कशपका सञ्चालक हुन्। उमेर करिब ४० वर्ष।
२. अफताब अन्सारी — रौतहट जिल्लाका स्थायी बासिन्दा, हाल वीरगञ्ज–१३ मा रहेको सोही वर्कशपमा कार्यरत। उमेर करिब २१ वर्ष।
पक्राउ परेका दुवैजनामाथि अपहरण, शरीरबन्धक तथा जबरजस्ती करणी अभियोगमा पर्सा जिल्ला अदालतबाट पाँच दिनको म्याद थप अनुमति लिइ थप अनुसन्धान भइरहेको जिल्ला प्रहरी कार्यालय पर्साका प्रवक्ता एवं प्रहरी नायब उपरीक्षक किशोर लम्सालले जानकारी दिए।
