वीरगंज । सङ्घीय खानेपानी मन्त्री प्रदीप यादव र वीरगञ्ज महानगरपालिकाका प्रमुख राजेशमान सिंहलाई मोबाइल फोनमार्फत ज्यान मार्ने धम्की दिँदै अपशब्द प्रयोग गरेको आरोपमा पर्सा प्रहरीले एक युवतीलाई नियन्त्रणमा लिएको छ। पक्राउ परेकी युवती बाराको कलैया उपमहानगरपालिका–२६ सिसुवा महेशपुरकी निवासी तथा हाल वीरगञ्ज–१३ मुर्ली बस्दै आएकी तुलसी साहकी छोरी किरण साह हुन्।
जिल्ला प्रहरी कार्यालय पर्साका प्रवक्ता डिएसपी किशोर लम्सालका अनुसार मन्त्री यादव र मेयर सिंहले आफूहरूलाई किरणले धम्की दिएको गुनासो गरेपछि उनलाई पक्राउ गरिएको हो। हाल उनीसँग सोधपुछ जारी छ। प्रारम्भिक अनुसन्धानमा किरणले वीरगञ्जमा फैलिएको भनिएको हैजा सङ्क्रमणप्रति असन्तुष्टि जनाउने क्रममा धम्कीपूर्ण अभिव्यक्ति दिएको देखिएको छ। उनले आफ्ना परिवारका सदस्य हैजाका कारण आईसीयूमा भर्ना भएको दाबी गरेकी थिइन्। तर अनुसन्धानमा उनका कुनै पनि परिवारजन हैजा वा झाडापखालाका कारण अस्पतालमा भर्ना नभएको पुष्टि भएको छ। किरणका बुवा तुलसी साह भने दमको पुरानो रोगका कारण उपचारमा भर्ना भएका थिए, तर हाल डिस्चार्ज भइसकेका छन्। किरणले पनि अहिले उनका परिवारका सदस्य अस्पतालमा नरहेको स्वीकार गरेकी छिन्।
यसबीच, मन्त्री यादव र किरण साहबीचको अभद्र फोन संवादको अडियो क्लिप शुक्रबारदेखि सामाजिक सञ्जाल फेसबुकमा भाइरल बनेको छ। प्रहरीले यो धम्की मन्त्री यादव र मेयर सिंहको छवि धुमिल गर्ने उद्देश्यले दिइएको हुन सक्ने आशंका गरेको छ। साथै, किरण कुनै समूह वा व्यक्तिबाट प्रेरित भएको सम्भावनामा समेत अनुसन्धान भइरहेको प्रहरीले जनाएको छ। पर्सा प्रहरीले घटनालाई गम्भीर रूपमा लिएर दोषीमाथि कानुनी प्रक्रिया अघि बढाउने तयारी गरेको छ।
