बीरगंज, १५ भदौ । गृहमन्त्री रमेश लेखकले निजी विद्यालयलाई क्रमशः गैरनाफामूलक बनाउने व्यवस्था लागू नहुने स्पष्ट पार्नुभएको छ। उहाँका अनुसार प्रतिनिधिसभामा पेश भएको शिक्षा विधेयकमा राखिएको निजी विद्यालयलाई गैरनाफामूलक बनाउँदै लैजाने प्रावधान हटाइनेछ। गृहमन्त्री लेखकले भने, “निजी विद्यालयलाई गैरनाफामूलक बनाउँदै लैजाने भन्ने व्यवस्था हटाइन्छ। निजी क्षेत्रका विद्यालयलाई समाप्त गर्ने कुनै योजना छैन।”
आईतबार बीरगंजमा निजी विद्यालय सञ्चालकहरूले शिक्षा विधेयकका केही प्रावधानमा असहमति जनाउँदै सुनुवाइको मागसहित गृहमन्त्रीलाई ज्ञापनपत्र बुझाएका थिए। त्यस अवसरमा गृहमन्त्री लेखकले यस विषयमा कुनै द्विविधा नरहेको र मन्त्रिपरिषदमा पनि छलफल भइसकेको जानकारी दिनुभयो। उहाँले सरकारी विद्यालयलाई सक्षम बनाउँदै निःशुल्क शिक्षा दिने लक्ष्य राखिएको र चाहनेले निजी विद्यालयमा पनि पढ्न पाउने व्यवस्था हुने बताए।
निजी विद्यालय सञ्चालकहरूको टोलीमा प्याब्सनका केन्द्रीय सदस्य छेदुप लामा, पर्सा जिल्ला अध्यक्ष सरोज प्रसाद चौधरी, सचिव अशोक संग्रौला, नगर अध्यक्ष राहुल श्रीवास्तव, नगर सदस्य विजय बल, एन-प्याब्सनका केन्द्रीय वरिष्ठ उपाध्यक्ष रामविनय चौरसिया, नगर अध्यक्ष जियालाल गुप्ता, सचिव शेख अजहर, सन्नी दूबे लगायत सहभागी थिए। उनीहरूले शिक्षा विधेयकमा निजी विद्यालयलाई कमजोर बनाउने गरी सिफारिस गरिएका बुँदा संशोधन गरी मात्र प्रतिनिधिसभाबाट पारित गर्नुपर्ने माग गर्दै गृहमन्त्रीको ध्यानाकर्षण गराए।
