वीरगंजमा गृहमन्त्रीको पत्रकार सम्मेलन साहबुद्दिनकै कारण बन्यो विवादास्पद

वीरगंज —  गृहमन्त्री रमेश लेखकको उपस्थितिमा सोमबार वीरगंजमा आयोजित पत्रकार सम्मेलन नेपाली कांग्रेसका नेता मोहम्मद साहबुद्दिनको व्यवहारका कारण विवादास्पद बनेको छ । पत्रकारहरूले गृहमन्त्रीसँग प्रश्न गरिरहेकै बेला साहबुद्दिनले पत्रकारलाई नै गाली गर्दै अवरोध गर्ने प्रयास गरेपछि माहोल तातेको हो ।
पत्रकारहरूले साहबुद्दिनको विगतका विवादास्पद क्रियाकलापबारे प्रश्न उठाउँदा उनी असमञ्जसमा परेर आक्रामक बनेका थिए । विशेषगरी युथ्स अफ वीरगंजका पत्रकार सौरभ साहले पर्साका प्रमुख जिल्ला अधिकारी (सीडीओ) र प्रहरी प्रमुख (एसपी) लाई ‘५० जुत्ता हान्छु’ भनी धम्की दिएको घटनामा किन अहिलेसम्म कारबाही नभएको भन्ने प्रश्न उठाएका थिए । यस्तै, मुस्लिम समुदायको दाह कार्यक्रममा उनले प्रहरीमाथि गाडी हुइक्याएको घटनामा समेत कारबाही हुन नसकेको विषयमा प्रश्न सोध्दा साहबुद्दिन उत्तेजित भएका थिए ।
त्यसैगरी, अदालतमा फर्जी नागरिकता सम्बन्धी मुद्दा विचाराधीन भइरहँदा पनि कांग्रेस पार्टीले उनलाई किन संरक्षण गरिरहेको छ भन्ने प्रश्न उठ्दा साहबुद्दिन थप असहज बनेका थिए । उनकी पत्नी नजमा बेगममाथि आर्थिक ठगीसम्बन्धी मुद्दामा जिल्ला अदालत बाराले पक्राउ पुर्जी जारी गरिसके पनि साहबुद्दिनले आफ्नो राजनीतिक हैसियतको आडमा पटक–पटक उनलाई कारबाहीबाट जोगाउँदै आएको आरोप पनि पत्रकारहरूले सार्वजनिक गरेका थिए।
पत्रकारहरूले उठाएका ती प्रश्नका कारण मन्त्रीकै सामु साहबुद्दिनको ‘कालो चिट्ठा’ खुलेको देखिन्थ्यो । ठगी आरोपमा पत्नी फरार भएको प्रसंग उठेपछि साहबुद्दिनले पत्रकारलाई अश्लील गाली गर्दै धम्क्याएपछि केहीबेर पत्रकार सम्मेलन नै अवरुद्ध हुने स्थिति आएको थियो ।
साहबुद्दिनमाथि अरूको नागरिकताको वैधता प्रश्न गर्ने तर आफू भने फर्जी नागरिकताको आधारमा राजनीतिक सक्रियता देखाइरहेको आरोपसमेत सार्वजनिक भएको छ ।
आजको पत्रकार सम्मेलनमा कांग्रेस नेता साहबुद्दिनको विवादित चरित्र पुनः सतहमा आएको छ ।