वीरगंज । अहिले गम्भीर राजनीतिक अस्थिरताको अवस्थाबाट गुज्रिरहेको छ। सरकार बन्ने र भंग हुने क्रम, अस्थायी गठबन्धन र स्पष्ट नीतिको अभावले राज्यप्रति जनआस्था कमजोर बन्दै गएको छ। यसले आम नागरिक मात्र होइन, देशको भविष्य बोकेको युवा पुस्तालाई समेत अन्योलमा पारेको छ।
राजनीतिक अस्थिरताका कारण विकास निर्माणका गतिविधि प्रभावित भएका छन्। शिक्षा, स्वास्थ्य, रोजगारी र सुशासनजस्ता आधारभूत क्षेत्रमा दीर्घकालीन नीति तय हुन नसक्दा जनतामा निराशा बढ्दै गएको छ। सत्ता केन्द्रित राजनीति र स्वार्थ समूहको दबाबले राष्ट्रिय हित पछाडि परेको अनुभूति सर्वसाधारणमा फैलिँदै छ।
सबैभन्दा गम्भीर विषय युवामा बढ्दो निराशा हो। देशभित्र भविष्य नदेखेर हजारौं युवा रोजगारी र सुरक्षाको खोजीमा विदेशिन बाध्य छन्। राजनीतिक दलहरूले युवालाई परिवर्तनको आधारशिला भने पनि निर्णय प्रक्रियामा उनीहरूको भूमिका सीमित छ। फलस्वरूप, युवाको आवाज सडक र सामाजिक सञ्जालमै सीमित रहन्छ र राज्य नीतिमा समावेश हुन सक्दैन।
अब देशले स्पष्ट दिशा तय गर्नैपर्छ। राजनीतिक स्थिरता बिना आर्थिक विकास सम्भव हुँदैन। त्यसका लागि दलहरूबीच न्यूनतम राष्ट्रिय सहमति, पारदर्शी शासन व्यवस्था र जवाफदेही नेतृत्व अपरिहार्य छ। साथै, युवालाई नीति निर्माण, नेतृत्व विकास र रोजगारी सिर्जनामा प्रभावकारी रूपमा सहभागी गराउने समय आएको छ।
राजनीति केवल सत्ता हात पार्ने माध्यम होइन, यो राष्ट्र निर्माणप्रतिको जिम्मेवारी हो। यदि आज पनि अस्थिरता र स्वार्थ प्रेरित राजनीति दोहोरिरह्यो भने त्यसको गहिरो मूल्य आगामी पुस्ताले चुकाउनुपर्नेछ। अब विकल्प स्पष्ट छ, मुलुकलाई अस्थिरतामै अल्झाइराख्ने कि स्थायित्व र समृद्धिको बाटोमा अघि बढाउने?
️ श्याम यादव – कानुनका विद्यार्थी
