वीरगञ्ज । पप्पु कन्सट्रक्सनका पूर्व सञ्चालक हरिनारायण रौनियारसहितको भ्रष्टाचार मुद्दाको सुनुवाइ सर्वोच्च अदालतमा नसकिएपछि ‘हेर्दाहेर्दै’मा राखिएको छ ।
न्यायाधीशद्वय मनोजकुमार शर्मा र महेश शर्मा पौडेलको संयुक्त इजलासमा गत साउन २० गतेदेखि सुनुवाइ भइरहेको मुद्दामा आज पनि सुनुवाइ नटुंगिएपछि भोलिका लागि पुनः तोकिएको हो ।
गुणस्तरहीन पुल निर्माण गरेको अभियोगमा विशेष अदालतले दोषी ठहर गरेपछि हरिनारायण रौनियारसहित ८ जनाले सर्वोच्च अदालतमा पुनरावेदन गरेका थिए । विशेष अदालतको फैसलाप्रति असन्तुष्टि जनाउँदै अख्तियार दुरुपयोग अनुसन्धान आयोगले पनि ११ जनालाई प्रतिवादी बनाएर पुनरावेदन दायर गरेको थियो । सर्वोच्चले दुवै पक्षको पुनरावेदनलाई एकसाथ राखेर सुनुवाइ गरिरहेको छ ।
विशेष अदालतले पप्पु कन्सट्रक्सनले बनाएका पुलको गुणस्तर नपुगेको ठहर गर्दै अख्तियारले दायर गरेको मुद्दामा हरिनारायण रौनियार र उनका छोरा सुमित रौनियार (पप्पु) लाई दोषी ठहर गरेको थियो ।
अदालतले उनीहरूलाई जनही साढे तीन करोड रुपैयाँ जरिवाना तोकेको थियो । मुद्दाको सुनुवाइ भोलि पनि जारी रहने सर्वोच्च अदालतले जनाएको छ ।
