काठमाडौं, नेपाल – कानुन संकायमा अध्ययनरत हजारौं विद्यार्थीहरूको लामो समयदेखिको मागलाई सम्बोधन गर्दै नेपाल बार काउन्सिलले अबदेखि अधिवक्ता लाइसेन्स परीक्षा (Bar License Exam) वर्षमा दुईपटक सञ्चालन गर्ने निर्णय गरेको छ।
यो ऐतिहासिक निर्णय नेपाल विद्यार्थी संघ (नेविसंघ) को निरन्तर पहल, दबाब, र बार काउन्सिल समक्ष बुझाइएको ज्ञापनपत्रको सकारात्मक परिणामको रुपमा आएको हो।
नेविसंघले विद्यार्थीहरूका समस्या पहिचान गर्दै ६–६ महिनामा अधिवक्ता परीक्षा सञ्चालनको माग राख्दै बार काउन्सिलसँग नियमित संवाद, बैठक, र दबाबमुलक कार्यक्रमहरू सञ्चालन गर्दै आएको थियो। त्यसको फलस्वरूप अन्ततः बार काउन्सिलले वार्षिक रूपमा दुईपटक परीक्षा सञ्चालन गर्ने निर्णय लिएको हो, जसले विद्यार्थीहरूको करियर यात्रा अझ सहज, गतिशील र समयमै अघि बढ्न सहयोग पुर्याउनेछ।
नेविसंघले यस उपलब्धिलाई सबै कानुन विद्यार्थीहरूको साझा जितको रुपमा लिएको छ।
नेविसंघका अनुसार: “विद्यार्थीहरूको भोगाइ, संघर्ष र मागलाई हामीले निरन्तर रूपमा सम्बोधन गर्दै आएका थियौं। आज यो निर्णय हुनु हाम्रो आन्दोलन र संवाद दुवैको सफलता हो। हामी सम्पूर्ण कानुन विद्यार्थीहरूलाई बधाई दिन चाहन्छौं र आगामी दिनहरूमा पनि विद्यार्थीका हकहितका लागि अझै दृढताका साथ लागिरहनेछौं।”
नेपालका प्रमुख विश्वविद्यालयहरूबाट स्नातक गरी अधिवक्ता बन्ने तयारीमा रहेका हजारौं विद्यार्थीहरूका लागि यो निर्णय उत्साहजनक खबर हो। पहिले-पहिले वर्षमा एकपटकमात्र परीक्षा सञ्चालन हुँदा लामो पर्खाइ र समयको नोक्सानी हुने गरेको थियो। अब भने नयाँ प्रणालीले विद्यार्थीलाई समयमै पेसागत यात्रा अघि बढाउने अवसर दिनेछ।
यस निर्णयको स्वागत गर्दै सामाजिक सञ्जालहरूमा विद्यार्थी तथा अधिवक्ताहरूले नेपाल विद्यार्थी संघको प्रशंसा गरेका छन्।
नेपाल विद्यार्थी संघको सक्रियता र विद्यार्थी-हितमा गरिएको पहलको परिणामस्वरूप कानुन विद्यार्थीहरूका लागि ऐतिहासिक उपलब्धि भएको यो निर्णयले शिक्षा प्रणाली र पेसागत विकासमा नयाँ ढोका खोल्ने निश्चित छ।
