वीरगञ्ज । राजधानी काठमाडौंमा सम्पन्न प्रतिष्ठित सौन्दर्य प्रतियोगिता मिस्टर नेसनल २०२५ मा वीरगञ्जका अजहर आलमले दुई उपाधि जित्दै नगरको गौरव बढाएका छन्। उनले प्रतियोगितामा पब्लिक च्वाइस २०२५ र सेकेन्ड रनर अप को उपाधि हात पार्न सफल भएका हुन्।
यी दुवै उपाधि जित्ने आलम वीरगञ्जका पहिलो प्रतिनिधि बनेका छन्, जसले राष्ट्रिय स्तरमा यति ठुलो सफलता हासिल गरेका हुन्। प्रतियोगितामा उनले प्रस्तुत गरेको आत्मविश्वास, व्यक्तित्व र सार्वजनिक समर्थनले निर्णायक समिति र दर्शकहरूलाई प्रभावित पारेको थियो।
उनको यस सफलतालाई सम्मान गर्दै वीरगञ्ज महानगरपालिका–४ का वडाध्यक्ष जगत साह कानुले विशेष सम्मान प्रदान गरेका छन्। वडाध्यक्ष कानुसँगै समाजसेवी, युवा नेताहरू, सांस्कृतिक क्षेत्रका प्रतिनिधि र सर्वसाधारणको उल्लेखनीय उपस्थिति रहेको कार्यक्रममा आलमले आफ्नो सफलताको श्रेय परिवार, मित्र, प्रशिक्षक र सम्पूर्ण वीरगञ्जवासीलाई दिएका छन्।
अलामले भने, “यो सफलताले मलाई अझ जिम्मेवार बनाएको छ। आगामी दिनमा म अझ मेहनत गर्नेछु र देश तथा शहरको नाम अन्तर्राष्ट्रिय स्तरसम्म पुर्याउने प्रयासमा लागिरहनेछु।”उनको यो उपलब्धिले वीरगञ्जका युवाहरूलाई प्रेरणा दिने अपेक्षा गरिएको छ।
